გაეროს განვითარების პროგრამა (UNDP) გეგმავს, წამოიწყოს ორი ინიციატივა, რომლებიც მიზნად ისახავს ქვეყნების დახმარებას ბლოკჩეინ ტექნოლოგიის დანერგვაში.
UNDP-ის ფინანსური ტექნოლოგიების გუნდის, AltFinLab-ის ხელმძღვანელმა, რობერტ პასიცკომ Cointelegraph-ს განუცხადა, რომ ორგანიზაცია გეგმავს, მთავრობის ოფიციალური პირებისთვის ბლოკჩეინის საგანმანათლებლო პროგრამის, ასევე ბლოკჩეინის მრჩეველთა ორგანოს შექმნას.
ეს ინიციატივა დაეფუძნება UNDP-ის არსებულ ბლოკჩეინ აკადემიას გაეროს თანამშრომლებისთვის, თუმცა მიზანი მთავრობების დახმარება იქნება.
პასიცკომ აღნიშნა ისიც, რომ ახალი აკადემია წლის ბოლოს დაიწყებს ოპერირებას და შეარჩევს ოთხ მთავრობას სამუშაოდ. ინიციატივა ფორმალურად ერთი-ორი კვირის განმავლობაში უნდა დამტკიცდეს.
პასიცკოს თანახმად, UNDP-ის ხელმძღვანელობით ბლოკჩეინის მრჩეველთა ორგანიზაციის იდეა განიხილეს გაეროს გენერალურ ასამბლეაზე ნიუ-იორკში, რომელსაც 25 წამყვანი ბლოკჩეინ კომპანია ესწრებოდა, მათ შორის, Ethereum Foundation, Stellar Foundation და Polygon Labs. მისი თქმით, “თუ ყველაფერი კარგად წავა“, პროექტი შეიძლება ორ-სამ თვეში ამოქმედდეს.
ცნობისთვის, UNDP-ს უკვე აქვს საპილოტე პროექტები 20-მდე ქვეყანაში, რომლებიც მიზნად ისახავს ფინანსური ხელმისაწვდომობის გაუმჯობესებას ბლოკჩეინ ტექნოლოგიის გამოყენებით.
