არაბთა გაერთიანებულმა საამიროებმა ცენტრალური ბანკის ციფრული ვალუტით პირველი ტრანზაქცია განახორციელა, რაც მარტში, ამ პროექტის შესახებ გამოცხადების შემდეგ, პირველი მნიშვნელოვანი განახლებაა.
არაბთა გაერთიანებული საამიროების ფინანსთა სამინისტრომ სამშაბათს განაცხადა, რომ ტრანზაქცია იყო “ციფრული დირჰამის“ პროექტის საპილოტე ფაზის ნაწილი და ამისთვის გამოყენებული იქნა სამთავრობო გადახდების პლატფორმა mBridge.
სააგენტოების თქმით, ეს ტრანზაქცია იყო პირველი არაბთა გაერთიანებული საამიროების მთავრობისთვის და წარმოადგენს “ეროვნული ციფრული ვალუტის უფრო ფართო დანერგვისკენ გადადგმულ ნაბიჯს როგორც სამთავრობო, ისე კერძო სექტორში“.
ეს არის პირველი მნიშვნელოვანი განახლება CBDC-ის შესახებ მას შემდეგ, რაც არაბთა გაერთიანებული საამიროების ცენტრალურმა ბანკმა მარტში განაცხადა, რომ ციფრული ვალუტის გაშვება 2025 წლის მეოთხე კვარტალში დაიწყებოდა.
დუბაის ფინანსების ცენტრალური ანგარიშების აღმასრულებელმა დირექტორმა, აჰმედ ალი მეფტაჰმა, განაცხადა, რომ ტრანზაქცია ჩატარდა „ოპერაციული მზადყოფნის შესამოწმებლად და ცენტრალური ბანკის სისტემებთან უწყვეტი ტექნიკური ინტეგრაციის უზრუნველსაყოფად“.
ივლისში გამოქვეყნებულ პოლიტიკურ დოკუმენტში, არაბთა გაერთიანებული საამიროების ცენტრალურმა ბანკმა განაცხადა, რომ CBDC არის ცენტრალური ბანკის ფულის ციფრული ეპოქისთვის მზადყოფნის მცდელობა, და პასუხი ციფრული ეკონომიკის მზარდ საჭიროებებზე.
მან ასევე მიუთითა, რომ გაშვება ეტაპობრივად მოხდებოდა, ხოლო CBDC-ის მახასიათებლები გაშვების ეტაპზე მხოლოდ გადახდებით შემოიფარგლება, რათა თავიდან იქნას აცილებული კონკურენცია სხვა ფინანსურ პროდუქტებთან.
აღსანიშნავია, CBDC-ები ცხარე დებატების საგანია: კრიტიკოსები შეშფოთებულნი არიან, რომ მათ შეუძლიათ დაარღვიონ კონფიდენციალურობა და ძირი გამოუთხარონ ფინანსურ სექტორს, რადგან მომხმარებლები შეძლებენ იყვნენ ცენტრალური ბანკების პირდაპირი კლიენტები, ხოლო მომხრეები ამტკიცებენ, რომ CBDC-ებს შეუძლიათ გადახდის ეფექტურობის გაუმჯობესება და ფინანსური ხელმისაწვდომობის გაზრდა.
