მიმდინარე წლის მესამე კვარტალში ტრეიდინგ პლატფორმა Robinhood Markets-ის კრიპტოდან მიღებული შემოსავალი წლიურად 300%-ით გაიზარდა და Wall Street-ის მოლოდინებს გადააჭარბა.
ოთხშაბათს Robinhood-ში განაცხადეს, რომ მესამე კვარტალში ტრანზაქციებით მიღებული შემოსავალი წინა წლის ანალოგიურ პერიოდთან შედარებით 129%-ით გაიზარდა და $730 მილიონი შეადგინა. კომპანიამ ეს ზრდა მიაწერა $268 მილიონის კრიპტო შემოსავალს, რომელიც 300%-ზე მეტით გაიზარდა.
წინა წელთან შედარებით, კომპანიის მთლიანი შემოსავალი გაორმაგდა და $1.27 მილიარდი შეადგინა, რითაც ანალიტიკოსების $1.2 მილიარდის პროგნოზს გადააჭარბა. ერთ აქციაზე კომპანიის მოგება 259%-ით გაიზარდა და 61 ცენტი შეადგინა, რაც ასევე აჭარბებს ანალიტიკოსების შეფასებას (51 ცენტი).
ტრადიციულად, Robinhood-ი ცნობილია საფონდო ვაჭრობის პლატფორმით, მაგრამ ის საცალო და ინსტიტუციური კრიპტო მომხმარებლების მოზიდვასაც ცდილობს. ამ მიზნით, ივნისში მან Bitstamp-ი შეიძინა და მომხმარებლებს ტოკენიზებულ აქციებსა და პროგნოზირების ბაზრებსაც სთავაზობს.
Robinhood-ის ფინანსურმა ხელმძღვანელმა, ჯეისონ უორნიკმა განაცხადა, რომ Bitstamp-დან და პროგნოზირების ბაზრებიდან მიღებული შემოსავალი “წლიურ ჭრილში დაახლოებით $100 მილიონს ან მეტს შეადგენს“.
Robinhood-ის აქციების ფასი ოთხშაბათს 4.15%-ით გაიზარდა და $142.48 შეადგინა, თუმცა სავაჭრო დღის დასრულების შემდეგ 2%-ზე მეტით დაეცა და $140-ს ჩამოსცდა.
აღსანიშნავია, რომ კომპანიის აქციების ფასი წლის განმავლობაში 280%-ზე მეტით გაიზარდა და 9 ოქტომბერს რეკორდულ ნიშულს, $152.46-ს მიაღწია, მაგრამ კრიპტობაზრის ვარდნამ შემდგომი ზრდა შეაჩერა.
აღმასრულებელი დირექტორი პროგნოზირების ბაზრებსა და ტოკენიზებულ აქციებზე საუბრობს
Robinhood-ის აღმასრულებელმა დირექტორმა, ვლადიმირ ტენევმა ინვესტორებს კონფერენციაზე განუცხადა, რომ კომპანიას პროგნოზირების ბაზრების გლობალური ხელმისაწვდომობის გასაზრდელად “რამდენიმე ვარიანტი“ აქვს.
ტენევმა აღნიშნა, რომ მისი კომპანიის ტოკენიზებული აქციების შეთავაზებები “არ არის იმდენად ურთიერთთავსებადი, როგორც ჩვენ გვსურს, მაგრამ ეს მხოლოდ იმიტომ, რომ ისინი DeFi-ზე ჯერ არ არიან“.
“ვფიქრობ, დროთა განმავლობაში, ურთიერთთავსებადობა გაიზრდება, როგორც ეს სხვა კრიპტოაქტივების შემთხვევაში მოხდა — თუნდაც ისინი სხვა ბლოკჩეინებზე იყოს, საზოგადოება მაინც ცდილობს, ჩაერთოს მასში და ხიდები ააშენოს, ამიტომ ვფიქრობ, რომ ეს ნაკლებად საგანგაშოა“, - თქვა ვლადიმიერ ტენევმა.