პაკისტანი რუპით გამყარებული სტეიბლკოინის გაშვებას განიხილავს, რადგან, ექსპერტების აზრით, ციფრული აქტივების რეგულირების შეფერხებამ ქვეყანას შეიძლება $25 მილიარდამდე ეკონომიკური შესაძლებლობა დააკარგვინოს.
პაკისტანის ბანკების ასოციაციის (PBA) პრეზიდენტმა, ზაფარ მასუდმა მდგრადი განვითარების პოლიტიკის ინსტიტუტის (SDPI) კონფერენციაზე სიტყვით გამოსვლისას განაცხადა, რომ ქვეყანას კრიპტოთი $20–$25 მილიარდის მოზიდვა შეუძლია.
მასუდმა ყურადღება გაამახვილა სტეიბლკოინების გლობალური ბაზრის ბუმზე და დაამატა, რომ პაკისტანი “სერიოზულად განიხილავს რუპით გამყარებულ სტეიბლკოინს“, ამავე დროს, მისი აზრით, ცენტრალური ბანკის ციფრულ ვალუტას (CBDC) შეუძლია გააუმჯობესოს ფინანსური ხელმისაწვდომობა და შეამციროს ფულადი გზავნილების ხარჯები.
პაკისტანის სახელმწიფო ბანკის გადახდების დირექტორის მოადგილემ, ფაიზალ მაზჰარმა განაცხადა, რომ CBDC-ის პროტოტიპი უკვე მუშავდება მსოფლიო ბანკისა და საერთაშორისო სავალუტო ფონდის (IMF) დახმარებით და სრულ გაშვებამდე საპილოტე ფაზაა დაგეგმილი.
პაკისტანი საკუთარი სტეიბლკოინის გამოშვება მას შემდეგ გადაწყვიტა, რაც ფინტექ სტარტაპმა ZAR-მა, რომელიც დოლარით გამყარებული სტეიბლკოინების ხელმისაწვდომობის გაზრდაზე მუშაობს პაკისტანში, $12.9 მილიონი მოიპოვა დაფინანსების რაუნდში, რომელსაც Andreessen Horowitz (a16z) ხელმძღვანელობდა.
აღსანიშნავია, რომ პაკისტანი ექვსი ადგილით დაწინაურდა Chainalysis-ის 2025 წლის გლობალური კრიპტო ათვისების ინდექსში და მესამე პოზიცია დაიკავა, რითაც განამტკიცა თავისი სტატუსი, როგორც ერთ-ერთმა ყველაზე სწრაფად მზარდმა კრიპტოვალუტის ბაზარმა მთელ მსოფლიოში.
სექტემბერში, პაკისტანმა კარი გაუღო საერთაშორისო კრიპტო ბირჟებს და ვირტუალური აქტივების სერვისის პროვაიდერებს (VASPs) და ახალი ფედერალური მარეგულირებელი ჩარჩოს ფარგლებში ისინი ლიცენზიის მისაღებად მოიწვია.
