გასული კვირის განმავლობაში, არაჩანაცვლებადი ტოკენებისა (NFT) და მიმკოინების ბაზრები მცირედით აღდგა, რაც კრიპტო სივრცეში რისკის სენტიმენტის გაუმჯობესებას ემთხვევა.
სამშაბათს, CoinGecko-ს მონაცემებმა აჩვენა, რომ NFT-ის გლობალური საბაზრო კაპიტალიზაცია 5 ნოემბრის $3.5 მილიარდიდან $3.9 მილიარდამდე გაიზარდა, რაც თითქმის 12%-იანი ზრდაა ერთ კვირაში.
კვირების განმავლობაში შეზღუდული აქტივობის შემდეგ, ტრეიდერები, როგორც ჩანს, მაღალრისკიან აქტივებს უბრუნდებიან, მიუხედავად იმისა, რომ გრძელდება მაკრო გაურკვევლობა, რომელიც აშშ-ის მთავრობის “შათდაუნის” საკითხითაა განპირობებული.
აღდგენა NFT-ის საერთო საბაზრო კაპიტალიზაციის მკვეთრი კლების შემდეგ მოხდა. როგორც Cointelegraph-ი იტყობინებოდა, NFT-ის გლობალური საბაზრო ღირებულება 5 ოქტომბრიდან 5 ნოემბრის ჩათვლით 46%-ით დაეცა.
აღდგენა არ შეეხო ყველა "ლურჯ ჩიპს"
CryptoSlam-ის თანახმად, ტოპ-20 NFT კოლექციიდან მხოლოდ ნაწილში დაფიქსირდა გაყიდვების მნიშვნელოვანი ზრდა.
მონაცემებმა აჩვენა, რომ CryptoPunks-ის შვიდდღიანი გაყიდვები 22.8%-ით გაიზარდა და თითქმის $3 მილიონს მიაღწია, ხოლო Mutant Ape Yacht Club-ისა და Milady Maker-ის გაყიდვები, შესაბამისად, 36.5%-ით და 80%-ით გაიზარდა.
Polygon-ზე დაფუძნებული Courtyard-ის გაყიდვები ასევე 14%-ზე მეტით გაიზარდა, ხოლო მცირე Ethereum პროექტები, როგორიცაა Lil Pudgys, დაახლოებით, 24%-ით.
ამის საპირისპიროდ, Bored Ape Yacht Club-ი (BAYC), Pudgy Penguins-ი და Moonbirds-ი კლებას აგრძელებენ. BAYC-ის გაყიდვები გასულ კვირაში 10.3%-ით დაეცა, ხოლო Pudgy Penguins-მა და Moonbirds-მა, შესაბამისად, 23%-იანი და 2%-იანი ვარდნა დააფიქსირეს.
NFT გაყიდვების მიხედვით ტოპ-10 ბლოკჩეინს შორის უმრავლესობის გაყიდვების მოცულობის კლება 6%-დან 42%-მდე დიაპაზონში იყო, თუმცა კვირის განმავლობაში სამი ქსელი გამოირჩეოდა: BNB Chain (+53%), Polygon (+9.3%) და Flow (+43%).
ეს ხაზს უსვამს, რომ NFT-ის ამჟამინდელი ზრდა კონცენტრირებულია რამდენიმე კოლექციაზე, მაშინ როდესაც ფართო ლიკვიდურობა და ტრეიდერების მონაწილეობა შეზღუდული რჩება.
მიმკოინების ზრდა მთლიან სექტორს მოიცავს
NFT-ებისგან განსხვავებით, სადაც ზრდა შერჩეულ კოლექციებზე იყო კონცენტრირებული, მიმკოინების სექტორმა ბევრად ფართომაშტაბიანი აღდგენა აჩვენა: საბაზრო კაპიტალიზაციის მიხედვით ტოპ-10 მიმკოინის ტოკენმა ბოლო შვიდი დღის განმავლობაში ზრდა დააფიქსირა.
Dogecoin-ი (DOGE) გასულ კვირაში 8.7%-ით გაიზარდა, ხოლო Shiba Inu (SHIB) და Pepe (PEPE), შესაბამისად, 10.4%-ით და 7%-ით. Solana-ს ტოპ მიმკოინებიდან Bonk-ი (BONK) 11.8%-ით გაიზარდა, ხოლო Dogwifhat-ი (WIF) 14.2%-ით.
აშშ-ის პრეზიდენტის დონალდ ტრამპის ოფიციალური მიმკოინის ფასი ყველაზე მკვეთრად გაიზარდა დიდი კაპიტალიზაციის მიმკოინებს შორის და ბოლო შვიდი დღის განმავლობაში 14.2%-იანი ზრდა დააფიქსირა.
