ევროკავშირი განიხილავს ხელოვნური ინტელექტის (AI) კანონების ნაწილობრივ გადახედვას, რაც აშშ-ის მთავრობისა და Big Tech-ის კომპანიების მხრიდან ზეწოლის საპასუხო ნაბიჯია.
Financial Times-ის ინფორმაციით, ევროკომისია გეგმავს ციფრული წესების კრებულის, მათ შორის, გასულ წელს ძალაში შესული AI-აქტის ნაწილის შემსუბუქებას. ამის შესახებ გადაწყვეტილება 19 ნოემბერს უნდა იქნას მიღებული.
დამტკიცების შემთხვევაში, ბაზარზე მოქმედ გენერაციული AI-ის მიმწოდებლებს შესაძლოა ერთწლიანი საშეღავათო პერიოდი მისცეს და AI-გამჭვირვალობის წესების დარღვევისთვის დაკისრებული ჯარიმების აღსრულება 2027 წლის აგვისტომდე გადაავადოს.
ევროკავშირის AI-აქტი ძალაში 2024 წლის აგვისტოში შევიდა
კომისიამ ევროკავშირის პირველი AI-კანონმდებლობა 2021 წლის აპრილში შემოგვთავაზა და მისი მიზანი რისკზე დაფუძნებული AI-კლასიფიკაციის სისტემის შექმნა იყო.
ევროპარლამენტისა და ევროპის საბჭოს მიერ 2023 წელს მიღებული AI-აქტი ძალაში 2024 წლის აგვისტოში შევიდა, დებულებების ეტაპობრივი განხორციელება კი მომდევნო 6-36 თვის განმავლობაშია მოსალოდნელი.
FT-ის ცნობით, დებულებების უმეტესობა მაღალი რისკის AI-სისტემებზე, რომლებმაც შეიძლება “სერიოზული საფრთხე“ შეუქმნან მოქალაქეთა ჯანმრთელობას, უსაფრთხოებას ან ფუნდამენტურ უფლებებს, ძალაში 2026 წლის აგვისტოში უნდა შევიდეს.
“გამარტივების“ პროექტის მიხედვით, კომპანიებმა, რომლებიც მაღალი რისკის AI-ის გამოყენების წესებს დაარღვევენ, შესაძლოა, ერთწლიანი საშეღავათო პერიოდი მიიღონ.
როგორც ანგარიშშია აღნიშნული, წინადადება ჯერ კიდევ ექვემდებარება არაფორმალურ განხილვას კომისიის ფარგლებში და ევროკავშირის წევრ სახელმწიფოებთან.
ევროკავშირის მიერ AI-აქტის გარკვეული დებულებების პოტენციური შემსუბუქება ხაზს უსვამს ბრიუსელის ცვალებად მიდგომას ციფრული რეგულირებისადმი აშშ-ისა და ჩინეთის მხრიდან გამწვავებული გლობალური კონკურენციის ფონზე.
მას შემდეგ, რაც აშშ-მა 2025 წლის დასაწყისში ცენტრალური ბანკის ციფრული ვალუტის (CBDC) განვითარებაზე მუშაობა შეაჩერა, ევროპის ცენტრალურმა ბანკმა დააჩქარა მუშაობა ციფრულ ევროზე, მაგრამ მოგვიანებით განაცხადა, რომ ციფრული ნაღდი ფული 2029 წლამდე არ ამოქმედდება.